
أكثر الأمور المثيرة للاهتمام واللي أعجبتنا في اللعبة الأعلى تقييمًا في التاريخ، جراند ثفت أوتو 6، وبالتفصيل بعد ما جرّبها @dcig66 لمدة 20 يوم تقريبًا! ولا تشيلون هم، ما فيه حرق! 🔥 ♦️ القصة القصة هنا ماخذة طابع جدي أكثر مقارنة بالجزء الخامس. تبدأ الأحداث لما تطلع «لوسيا» من السجن ويستقبلها «جيسون»، ومن هنا يبدون مشوارهم في عالم الجريمة عشان يأمّنون لأنفسهم حياة أفضل. الأداء الصوتي والتمثيلي متقن بشكل رهيب؛ بتلاحظ إن شخصية لوسيا هي حقت السوالف والأخذ والعطاء، بينما جيسون له نبرة صوت عميقة وحواراته أقل، لكن عنده هيبة وحضور قيادي، ويبادر دايم في المواقف الصعبة. وبرضو أضافوا ميزة تخليك تغيّر زاوية الكاميرا وقت المشاهد السينمائية عن طريق زر R3، مع إن سالفة إنك تضطر تضغط عليه باستمرار ممكن تتعب إبهامك في المشاهد الطويلة. ♦️ الرسوميات والإبهار البصري اللعبة تقدم نقلة رسومية خرافية تخليك تستغرب كيف قدرت تشتغل بهالجودة على أجهزة الجيل الحالي بدون أي اختصارات. الشوارع مليانة ناس بأشكال وأطوال وأجسام مختلفة، وحركة موية البحر ورغوة الأمواج واقعية لدرجة إن أثر القوارب يبقى وراها لمسافة طويلة مثل الواقع. ومع دمج تقنية تتبع الأشعة (Ray Tracing) والـHDR، بتعيش أجواء غروب شمس خيالية بألوانها الوردية والبنفسجية الأيقونية، وحتى وأنت تغوص تحت الموية بتلاحظ ظلال السمك اللي يسبح فوقك تنعكس على جسمك مثلًا. وبرضو موجود طور تصوير (Photo Mode) متكامل، وتقدر تخفي واجهة الشاشة بضغطة زر عشان تعيش الجو وتندمج مع اللعبة بالكامل. ♦️ التناغم والذكاء الاصطناعي بين جيسون ولوسيا التبديل بين البطلين يصير بشكل لحظي حتى لو كانوا بنفس المكان، وتقدر تعزم الطرف الثاني يرافقك في الأنشطة، أو تترك له السواقة وأنت بس تحدد الوجهة في الخريطة، أو تخليه يشيل شنط الفلوس الإضافية وقت السطو. وبرضو فيه نظام علاقة بينهم من 4 درجات يأثر على حواراتهم وتصرفاتهم وحتى مسار القصة. أما الذكاء الاصطناعي للشخصيات والمارة في الشارع فهو رهيب؛ لوسيا تتدخل من نفسها عشان تحميك وقت التسلل، والناس اللي يسوقون في الشوارع يفتحون لك الطريق في المسار الأيسر ويتفادون إنهم يصدمونك، وبنفس الوقت بتشوف سواقين متهورين يحاكون عشوائية الواقع. ♦️ عودة نظام التفاعل مع المارة حتى خلال السواقة اللعبة رجّعت ميزة الحوارات التفاعلية مع الغرباء اللي كانت في Red Dead Redemption 2، بحيث تقدر تسلّم على أي شخص تشوفه في الشارع، وبيجيك رد لطيف أو مستغرب أو حتى قليل أدب، ووقتها لك الخيار يا إنك تهدي الوضع أو تصعّدها وتقلب هوشة بالأيادي. والرهيب في الموضوع إنك تقدر تتفاعل مع المشاة والسواقين بهالطريقة حتى وأنت تسوق سيارتك. ♦️ القيادة وتصنيفات السيارات السواقة هنا تدمج بشكل رهيب بين واقعية المحاكاة ومتعة أسلوب الـArcade. السيارات مقسمة لفئات دقيقة مثل (Tuner) و(Muscle)، وأنظمة دفع مختلفة (أمامي، خلفي، رباعي، وحتى كهربائي)، وكل نوع له وزنه وطريقة سواقته الخاصة. والمفاجأة إن السيارة لازم تشغّلها يدويًا بضغطة زر البنزين قبل ما تتحرك، وبرضو لك الحرية تفتح وتقفل الشبابيك، وتطفي المكينة وأنت جالس داخل السيارة، وتستخدم الإشارات اللي تطفي من نفسها بعد ما تاخذ اللفة. ♦️ هوس التفاصيل في السيارات، شريط أنوار الـLED النهارية مثل الواقع يقلب أصفر لما تشغّل الإشارة، وبعدها يرجع أبيض بالتدريج زي بعض السيارات من العلامات الفخمة. ولما تنزل من السيارة وتقفلها عن بُعد بالريموت، المرايا الجانبية تتصفط من نفسها. وبرضو أضافوا تانكي بنزين للمركبات البرية والبحرية والجوية (يمشّيك فترات طويلة بدون ما يزعجك)، ونظام ضرر واقعي تتكسر وتطيح فيه قطع السيارة زي الأنوار الأمامية، والكفرات ممكن تنبنشر من كثرة الصدمات القوية، مو بس من إطلاق الرصاص عليها. نظام الحوادث في السيارات صار أصعب، ومجال تحمّل الخطأ صار أقل، فلازم تنتبه وتاخذ حذرك بشكل أكبر وأنت تسوق. ♦️ اجمع غنائمك في شنطة سيارتك زي نظام الحصان في Red Dead Redemption 2، شنطة السيارة هنا صارت مخزن أساسي ما تقدر تستغني عنه؛ بحيث تحفظ فيها أسلحتك الثقيلة وتغيّر ملابسك منها، وحتى تخبّي جواها «شنط الفلوس» اللي تسرقها مثلًا وقت السطو، عشان ما تتمشى فيها بالشارع وتلفت الانتباه. ♦️ تعقيد سرقة السيارات وامتلاكها سرقة السيارات العادية صارت تتطلب إنك تكسر القزاز وتلعب لعبة مصغرة (Mini-game) عشان «تشبك الأسلاك»، وهالشي بيشغّل الإنذار ويجيب لك الشرطة، بس مع تقدمك في القصة بتتعلم طرق صامتة تخليك تتفادى سالفة إنذار السيارة. أما السيارات الجديدة والفخمة فتشتغل بـ«مفتاح رقمي» وما تقدر تشغّلها بشبك الأسلاك، ولو سرقتها من راعيها في الشارع ممكن يكون فيها متتبع GPS يرسل موقعك للشرطة ويوهقك. والمفاجأة إن ما فيه معارض تقليدية تشتري منها سيارات؛ الطريقة الوحيدة عشان تمتلك سيارة للأبد هي إنك تسرقها وبعدها تروح لكراجات مختصة و«تسجلها باسمك» مقابل مبلغ مالي. وبتلقى خيارات تعديل واسعة، أو تقدر تشتري أطقم تعديل كاملة بضغطة زر. ♦️ مداهمة العصابات والمهام المؤقتة عمليات السرقة تختلف في صعوبتها ومكاسبها؛ يعني سرقة محل مجوهرات تحتاج تخطيط صح بسبب الكاميرات وحراس الأمن وضيق الوقت قبل ما توصل الشرطة. والحماس هنا إن الفلوس والغنائم اللي تسرقها ما تنضاف لرصيدك على طول، لازم تروح لأشخاص معينين عشان تصرّفها وتحولها لفلوس كاش. وبرضو تقدر تداهم مقرات العصابات وتجار المخدرات وتسرق منهم «المنتجات المحظورة» وتبيعها. وغير المهام الرئيسية والجانبية، فيه مهام بوقت محدد تختفي وتضيع عليك للأبد لو ما لحقت عليها، أو تقول لك إنك ترجع لها بوقت ثاني. ♦️ نظام الشرطة وملف الإجرام (Criminal Profile) الشرطة صارت تتبعك عن طريق كاميرات المراقبة، وعلى حسب شكلك وسيارتك، وإذا كنت تشتغل لحالك أو مع لوسيا. وحتى بعد ما تفلت من المطاردة، تبقى منطقة الجريمة خطرة، ولازم تغيّر ملابسك أو سيارتك عشان ما يتعرفون عليك من جديد. بس تمنينا لو كان فيه خيار إنك تدفع غرامة مالية في مطاردات النجمة والنجمتين عشان يضيف تنوع واقعي أكثر في اللعب. وبرضو اللعبة أضافت نظام «ملف الإجرام» اللي يشبه نظام الشرف في RDR2، فإذا نفذت المهام باحترافية وتجنبت القتل العشوائي بيرتفع تصنيفك لـ«محترف»، بينما الفوضى والتخريب ينزّلون تصنيفك، وبتلاحظ إن تعامل الناس معك يبدأ يختلف، وكذلك صعوبة الأعداء، وحتى ممكن يأثر على نهاية القصة. ♦️ القتال والأسلحة وتكتيكات المواجهة ودّع سالفة إنك تشيل 20 سلاح في جيبك؛ كل بطل يقدر يشيل سلاحين صغيرين وسلاح يدوي بس، بينما الأسلحة الثقيلة تنحفظ في شنطة السيارة. ولو تمشيت بسلاح ظاهر في الشارع، بيخافون الناس وبيبلغون عليك الشرطة. تقدر توجّه ضربات قاتلة أو غير قاتلة عن طريق خاصية الـFocus اللي تبطئ الوقت وتحدد لك الأماكن الحساسة (بالأحمر) والمفاصل (بالأصفر) عشان تشل حركة خصمك بدون ما تقتله. وبرضو تقدر تستخدم حبوب مسكنة ترجّع طاقتك، وإبر أدرينالين تزيد قوة تحمّلك وتقلل استهلاك اللياقة والتركيز بشكل مؤقت. وفي المضاربات بالأيادي، جيسون متقن قتال الشوارع والمصارعة، بينما لوسيا تتميز بأسلوب قتال الـKickboxing. وتقدر تضرب خصمك بالمسدس نفسه وقت الاشتباك القريب عشان تطيحه بسرعة، وبعدها تفتش الأعداء وتاخذ فلوسهم أو حتى قبعاتهم ونظاراتهم. بس فيه مشكلة واجهتنا، وهي تأخر استجابة زر التفتيش أحيانًا، لدرجة تخليك تحوس وتتحرك حول جثة العدو لين يطلع لك الزر وتقدر تاخذ الفلوس مثلًا، هذا غير غياب ميزة إطلاق النار الأعمى وأنت متخبي ورا السواتر. ♦️ عالم ولاية ليونيدا والصوتيات وتقنيات DualSense الخريطة عملاقة ومبنية على ولاية فلوريدا ومدينة ميامي (Vice City)، وبتلاحظ فيها فرق واضح في مستوى المعيشة ونوعية السيارات بين الواجهة البحرية الراقية وباقي المناطق. وممكن تصادفك أحداث عشوائية في الطريق زي الحوادث المرورية والأنشطة الجانبية. والاهتمام بالتفاصيل وصل حتى للتحريك والأصوات؛ قطرات المطر تبقى على الشبابيك بعد ما يوقف المطر وبعدها تنشف، والحلق يتحرك وقت الأكل والشرب، والفرامل تحمرّ من الحرارة، والعرق يلمع على البشرة، والملابس تتكرمش وتتحرك مع الهواء، وحتى لو قفلت باب البلكونة القزازي بيختفي إزعاج الشارع. وبرضو اللعبة مستغلة يد الـDualSense صح؛ بتحس بالمطبات ونبض الموسيقى في المراقص، وتسمع المكالمات وتوجيهات الـGPS من سماعة اليد نفسها. وفوق هذا تقدر تشتري سماعات أذن تسمع فيها الراديو والبودكاست وأنت تتمشى، غير نظام الموسيقى الديناميكي اللي يزيد إيقاعه وحماسه مع توتر الأحداث، ويخف لما تهدأ الأوضاع. 🔥 بعد ما تعرفتوا على أبرز تفاصيل اللعبة، وش أكثر شيء متحمسين له في GTA 6؟ @RockstarGames
























